غزل ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ حنیف عابد
مٹا کر ہجر کا دل سے نشاں تک
تری خاطر یقیں بدلا گماں تک
ہوئے حیرت زدہ رستے سفر میں
چلا آیا جو پیچھے سائباں تک
کبھی تو ختم یہ بھی ظلم ہو گا
زمیں پر پھول کچلیں گے کہاں تک
چھلک کر اشک نے جب راز کھولا
سکوتِ درد ہم لائے فغاں تک
تحمل سے سہا ہر ظلم تیرا
کبھی شکوہ نہیں لائے زباں تک
ہمیں انجام سے غافل ڈرا مت
سفر کاٹا ہے ہم نے رائگاں تک
کشش ایسی ہے عابد اس گلی میں
نظر پھر لوٹ جاتی ہے وہاں تک
