فرصتِ گفتگو میں بھی حسرتِ گفتگو رہی
اذنِ سُخن نہ مل سکا دل میں ہی آرزو رہی
رعبِ جمالِ یار نے ہوش و حواس اُڑا دیے
اور یہ فضائے کیفِ جاں تا عمر چار سُو رہی
پاکیءِ دید شرط تھی حُسن کی بارگاہ میں
شیشہ ءِ دل بھی صاف تھا آنکھ بھی با وضو رہی
کتنے ہی خوش اداؤں نے روکا تھا راستہ مگر
تیری تلاش میں تھے ہم تیری ہی جستجو رہی
کھولے نہ تُو نے راز سب بولے نہ ہم بھی بے سبب
اپنا بھرم بھی رہ گیا تیری بھی آبرو رہی
کیسا عجیب خواب تھا مسلا ہوا گلاب تھا
رات عذاب دید سے چشم لہو لہو رہی
عمرِ رواں نے خال و خد نقش و نشاں بدل دیے
پردہِ ذہن پر مگر شکل وہ ہو بہو رہی
- محمد اویس ملک
Read more
Our
