میڈا عشق وی تُوں، میڈا یار وی تُوں

 میڈا عشق وی  تُوں،  میڈا  یار وی تُوں

میڈا  دین  وی   تُوں،  ایمان  وی   تُوں

میڈا جسم وی تُوں، میڈا روح وی تُوں

میڈا قلب  وی  تُوں، جند جان وی تُوں

میڈا   ذکر وی تُوں، میڈا فکر   وی تُوں

میڈا  ذوق   وی تُوں   وجدان  وی تُوں

میڈا    سانول     مٹھڑا     شام   سلوُنا

من       موہن      جانان      وی     تُوں

میڈا   دکھ سکھ  روون  کھلن وی تُوں

میڈا  درد  وی  تُوں  درمان   وی   تُوں

میڈا   خوشیاں   دا   اسباب   وی  تُوں

میڈے   سُولاں   دا   سامان   وی   تُوں

میڈے ٹھڈرے ساہ تے مونجھ منجھاری

ہنجواں    دا       طوفان      وی    تُوں

میڈا  وحشت  جوش   جنون  وی تُوں

میڈا     گریہ        آہ فغان     وی   تُوں

میڈا    شعر   عروض      قوافی     تُوں

میڈا   بحر وی   تُوں   اوزان  وی   تُوں

میڈا     اوّل      آخر        اندر        باہر

ظاہر      تے     پنہان         وی       تُوں

حضرت خواجہ غلام فرید