ـ ۔ ۔ بحضورِ تشنہ گانِ کربلا ۔ ۔ ۔

 ـ ۔ ۔ بحضورِ تشنہ گانِ کربلا ۔ ۔ ۔

نہ گُل کی تمنّا نہ شوقِ چمن ہے

یہ دل حُبِ آلِ نبیؐ میں مگن ہے

حُسینؑ و حَسنؑ ہیں وہ پیکر کہ جن میں​

بَتُولیؑ نجابت، رَسُولیؐ چلن ہے

مِرے سر میں سودائے زہراؑ و حیدر​ؑ

مِرے دل میں عشقِ رَسُولِؐ زمن ہے

تصوّر میں ہیں میرے سجّادؑ و زینب​ؑ

نگاہوں میں روئے حُسینؑ و حَسنؑ ہے

سکینہؑ کی وہ پیاس وہ ضبطِ گریہ​

کہ نہرِ فرات آج بھی نوحہ زن ہے

وہ معصوم اصغرؑ کی معصوم ہچکی

اِسی غم کے سکتے میں چرخِ کہن ہے

لہو میں اِدھر تُو نہایا ہے اصغر​ؑ

اُدھر تیرا باباؑ بھی خونیں کفن ہے

وہ زینبؑ جو کل تھی مدینے کی مالک​

وہ اَب کربلا میں غریبُ الوطن ہے

کہا ماں نے اکبرؑ کے قاتل سے، رُک جا​!

شبیہِ محمّدؐ ہے، نازک بدن ہے

یہ کیوں محوِ گریہ ہے محفل کی محفل​

یہاں کیا کوئی ذکرِ دارو رسن ہے؟

دکھا دے جھلک اب تو اے ماہِ زہراؑ

شہِ مُثَظَر، مُثَظَرِ انجمن ہے

کِھلے پھول ہیں جس میں زہراؑ کے ہر سُو​

محمّدؐ کا بھی کیا مہکتا چمن ہے

ستم سہہ کے بھی اُن کے تیور نہ بدلے​

وہی تمکنت ہے، وہی بانکپن ہے

حُسینؑ ابنِ زہراؑ کا مُکھڑا تو دیکھو​

علیؑ کی وجاہت، نبیؐ کی پبھن ہے

بہاؤ غمِ آلِ زہراؑ میں آنسو

یہ اہل مَوَدَّت کی رسمِ کُہن ہے

ثناء کیجئے کُھل کے آلِ عباؑ کی​

کہ ذِکر اُنکا خود آبروئے سُخن ہے

نہ چُھوٹے کہیں اُن کی نسبت کا دامن

بہت ہی بڑی دولت، اُن کی لگن ہے

نہ کیوں مُجھ پر اِترائے معجز بیانی​

کہ مُنہ میں علیؑ کا لُعابِ دہن ہے

نصِیرؔ اب میں کیوں مانگنے دُور جاؤں​

یہ مَیں ہُوں، یہ دروازۂ پنجتنؑ ہے۔

فرمُودۂ الشیخ سیّدپِیرنصِیرالدّین نصِیرؔ جیلانی،

رحمتُ اللّٰه تعالٰی علیہ، گولڑہ شریف

بیادِ بندۂ نصِیرؔ شاہد محی الدینؒ

از خالد شاہم، عابد محی الدّین ۔