اک بے قرار دل سے ملاقات کیجئے
جب مل گئے ہیں آپ تو کچھ بات کیجئے
پہلے پہل ہوا ہے مری زندگی میں دن
زلفوں میں منہ چھپا کے نہ پھر رات کیجئے
نظروں سے گفتگو کی حدیں ختم ہو چکیں
جو دل میں ہے زباں سے وہی بات کیجئے
کل انتقام لے نہ مرا پیار آپ سے
اتنا ستم نہ آج میرے ساتھ کیجئے
بس اک خامشی ہے ہر اک بات کا جواب
کتنے ہی زندگی سے سوالات کیجئے
نظریں ملا ملا کے نظر پھیر پھیر کے
مجروح اور دل کے نہ حالات کیجئے
دل کے سوا کسی کو نہیں اور کچھ خبر
دنیا سے کیا بیاں وہ حکایات کیجئے
