پہلی بار ملے ہو پھر بھی اپنے اپنے لگتے ہو

  غزل 

ٹُک ٹک ایسے دیکھ رہا تھا میرے سامنے بیٹھا شخص

جیسے وہ کچھ سوچ رہا ہو مجھ میں کھویا کھویا شخص 

پہلی بار ملے ہو پھر بھی اپنے اپنے لگتے ہو

میرے خوابوں میں رہتا ہے تم سے ملتا جلتا شخص

ریزہ ریزہ کر گئی اُس کو تیری یاد کی تیز ہوا

ریت کی صورت بکھرا ہے اب جو تھا پتھر جیسا شخص

بن بتلائے چھوڑ گیا ہے دل کا آنگن چپکے سے

میرے اندر جو رہتا تھا کل تک ہنستا بستا شخص 

پیار سے اپنا نام لکھا کرتے تھے جس کے ہاتھوں پر

اپنے ہاتھ کی ریکھاؤں میں آج بھی ہے اک الجھا شخص 

اُکھڑا اُکھڑا لہجہ اُس کا تلخی بھی ہے باتوں میں

صاف دکھائی دیتا ہے وہ پہلے سے کچھ بدلا شخص 

کون ہے ارشد پوچھو تو وہ کس کے پیار میں پاگل ہے 

جس کو پتھر مار رہا ہے ہر اک آتا جاتا شخص 

ارشدمحمودارشد