زندگی اس طرح گزاری ھے
جیسے اپنی نھیں ادھاری ھے
دل میں اک بوند بھی نھیں باقی
اور آنکھوں سے خون جاری ھے
آگے ھوتی تھی اپنے لب پہ ہنسی
اب تو گریہ ھے آہ و زاری ھے
موت بٹتی ھے میرے شہروں میں
رقصِ ابلیس ھے کہ جاری ھے
جس طرح سانپ سونگھ جاتا ھے
خوف ایسا دلوں پہ طاری ھے
میر صاحب بھی نہ اٹھا پائے
عشق پتھر ھی ایسا بھاری ھے
جانے والے جو یاد ھے تیری
یہ ھمیں جان سے بھی پیاری ھے
جو تری یاد میں گزر جائے
بس وھی زندگی! ھماری ھے
بن ترے عمر کس طرح کاٹیں ؟
ایک لمحہ بھی اب تو بھاری ھے
جب تری بزم میں جگہ پائ
ھم نے اپنی نظر اتاری ھے
میں تو اندر سے مر مٹا تجھ پر
اوپر اوپر سے بردباری ھے
زخم یوں اور بھی بہت کھائے
وار دل پہ لگا جو کاری ھے
جیسے ھم جانتے نھیں تم کو؟
ھم سے کیوں اتنی پردہ داری ھے؟
ھم سے جب چاھے زندگی لے لو
یہ ھماری نھیں ! تمھاری ھے
ھم تو گزرے ھیں اس کے ہاتھوں سے
ھم نے کب زندگی گزاری ھے
ھوتی ھو گی کبھی وفا لازم
اب یہ مضمون اختیاری ھے
لَو ٹنا ھے کہ آگے جانا ھے؟
موت کس دیس کی سواری ھے ۔۔۔۔
آصف عنایت
