ستاتے ہیں دلِ ناشاد کو پھر شاد کرتے ہیں
کرم کے رُوپ میں وہ آئے دن بیداد کرتے ہیں
پسِ مُردن جو ہیں آسُودۂ خاک اُن کے کوچے میں
وہ اب کیُوں اُن کی مٹّی اِس طرح برباد کرتے ہیں
دِل اُن کا، جان اُن کی، جو کہیں، تیّار ہیں قاصد
ذرا تم پُوچھ لو اُن سے، وہ کیا ارشاد کرتے ہیں
یہ خنجر آزمائی اور تم؟ توبہ ارے توبہ
چلو، چھوڑو، ہٹو، یہ کام تو جلاّد کرتے ہیں
رہی گنجائش اپنی اب نہ مسجد میں، نہ مندر میں
اُٹھو! اپنا الگ اِک میکدہ آباد کرتے ہیں
یہ مانا ہو گئی ہے مُستقل دُوری، مگر اب تک
وہ ہم کو یاد کرتے ہیں، ہم اُن کو یاد کرتے ہیں
نصِیرؔ اچّھا ہُوا جو کچھ ہُوا دُنیائے اُلفت میں
مِرے احباب کیا ذکرِ دلِ ناشاد کرتے ہیں ۔
سیّدپِیرنصِیرالدّین نصِیرؔ
read more
پیاسی بھٹک رہی ہوں سمندر لیے ہوئے
our
