میں اُس کا انتخاب بڑی دیر تک رہا

 وہ مجھ کو دستیاب بڑی دیر تک رہا

میں اُس کا انتخاب بڑی دیر تک رہا

دیکھا تھا اس نے مڑ کے مجھے اک نظر تو پھر

آنکھوں میں اضطراب بڑی دیر تک رہا

خوشبو مُقید ہو گئی لفظوں کے جال میں

کسی خط  میں اک گلاب بڑی دیر تک رہا

چہرے پہ اُتر آئی تھی تعبیر کی تھَکن

پلکوں پہ ایک خواب بڑی دیر تک رہا

پہلے پہل تو عشق کے آداب یہ بھی تھے

میں " آپ " وہ " جناب " بڑی دیر تک رہا

اک بار اُس نے مجھ کو پکارا تھا اور بس

ہوا میں وہ رباب بڑی دیر تک رہا

صبح تلک اُس چھت پہ ستارے مقیم تھے

کھڑکی میں اک ماہتاب بڑی دیر تک رہا

اُس کے سوال پر سبھی الفاظ مر گئے

اشکوں میں پھر جواب بڑی دیر تک رہا

گن گن کے اُس نے جب مجھے احسان جتائے

پوروں پہ پھر حساب بڑی دیر تک رہا

اک عمر تک میں اس کو بڑا قیمتی لگا

وہ بھی مجھے نایاب بڑی دیر تک رہا

۔ راحت اندوری