خدا کے واسطے دیکھو نہ مسکرا کے مجھے

 

نہ اپنے ضبط کو رسوا کرو ستا کے مجھے

خدا کے واسطے دیکھو نہ مسکرا کے مجھے

سوائے داغ ملا کیا چمن میں آ کے مجھے

قفس نصیب ہوا آشیاں بنا کے مجھے

ادب ہے میں جو جھکائے ہوئے ہوں آنکھ اپنی

غضب ہے تم جو نہ دیکھو نظر اٹھا کے مجھے

الٰہی کچھ تو ہو آسان نزع کی مشکل

دم اخیر تو تسکین دے وہ آ کے مجھے

خدا کی شان ہے میں جن کو دوست رکھتا تھا

وہ دیکھتے بھی نہیں اب نظر اٹھا کے مجھے

مری قسم ہے تمہیں رہروان ملک عدم

خدا کے واسطے تم بھولنا نہ جا کے مجھے

ہمارا کون ٹھکانہ ہے ہم تو بسملؔ ہیں

نہ اپنے آپ کو رسوا کرو ستا کے مجھے

بسمل عظیم آبادی